678 VIVENDAS ILEGAIS EN VIVEIRO

Tres informes da Policía Xudicial estiman que o Concello de Viveiro concedeu de forma presuntamente ilegal ata once licenzas urbanísticas, que permitirían a construción de 678 vivendas e un hotel no termo municipal, valéndose do trámite do silencio administrativo. As probas periciais forman parte da extensa investigación que desde fai tres anos desenvolve o Xulgado de Instrución nº 2 da localidade, despois de que estas posibles prácticas do alcalde, o socialista Melchor Roel, fosen denunciadas polo anterior rexedor, o popular César Aja.
As once licenzas concedidas -nove en construción, unha finalizada e outra paralizada- teñen en común os informes en contra -entre outros-dos técnicos municipais de urbanismo, que segundo queda de relevo nas dilixencias periciais, foron ignorados pola Xunta de Goberno que preside Roel «para aprobalas a través do silencio administrativo». Unha das máis representativas corresponde á promoción de 154 vivendas «Primeira Calidade», actualmente en construción nunha parcela de solo urbano non consolidado na que segundo «reiterados informes emitidos polo enxeñeiro municipal» non se pode edificar por carecer da condición de solar ao non haberse realizado obras de urbanización na contorna.
Nun informe datado a 5 de febreiro de 2009, a Policía Xudicial recolle como o enxeñeiro aconsellou ao alcalde en xullo de 2006 consultar á Xunta a cualificación urbanística da parcela. Roel, con todo, optou seis meses máis tarde por pagar unha asesoría técnica a un arquitecto externo, Manuel Cortón, para que lle xustifique «a viabilidade da construción». Os instrutores non só cren «que a licenza non se podía conceder por non reunir os requisitos» que marca a lei e entenden que Roel e a súa Xunta de Goberno puidesen incorrer nun hipotético delito de prevaricación, senón que atribúen a Cortón un suposto delito de falsidade documental por «un informe carente de fundamento legal e faltando á verdade».