E NON PASA NADA

A nosa comunidade autónoma non pode seguir rexistrando cada mes niveles de desemprego tan elevados, de ningunha maneira é asumible por una sociedade ver como centos de persoas perden o seu o emprego, a súa fonte de ingresos sen que pase nada e a desgraza se tome como algo conxuntural á espera de que a situación económica mundial mellore.
Xa vai sendo hora de recuperar os dous anos perdidos polo goberno galego facendo oposición do que realizou o bipartito, porque o certo é que a Xunta apenas leva ano e medio tomando medidas, cada una máis peregrina, algunha atinada, para impulsar a recuperación.
Somos un país, nación ou conxunto tribal que sobrevive das prexubilacións, ideadas polos gobernos de Felipe González, e que calaron moi fondo en sucesivos executivos.
Por iso é que a moitos galaicos iso de irse para a casa aos 65 ou máis anos non fai perder unha hora de sono, porque, a máis tardar, con 55 xa estará na casa deixando o seu posto de traballo a un rapaz de 25 que ten un futuro laboral de vinte anos como moito.
Así non se pode crecer, só se pode afundir ao conxunto de galegos  nunha miseria perenne e que vivan das nabizas sementadas na horta familiar ou que se vaian á capital do Reino a traballar na hostalería.
Temos riqueza de sobra e man de obra dunha cualificación máis que excelente, ademais de ser traballadores, pero estamos contaxiados pola política madrileña do subsidio e da subvención.
Cando finalice esta crise, volverá a medrar o cemento pola costa, os bancos financiarán urbanizacións e mentres dure o tempo de colocar tixolos o desemprego baixará, pero volverá a subir cando non haxa ninguén que compre as casas.
¿Cantas residencias pode asumir unha familia galega con mil euros ao mes? Ese é un misterio, porque os salarios aquí son máis que esmolas de subsistencia que xa se cobran as primeira vítimas: a xente xa comeza a morrer polas rúas, calquera día saltará na prensa o primeiro falecido de fame.
Non se pode maquillar o drama do paro e tampouco é de recibo recuperar o instituto franquista da Emigración e mandar a xente a traballar ao estranxeiro sexa con contrato ou de modo ilegal.
Ríase Feijóo cando o triste Touriño pensou en mandar aos parados a limpar os foxos das estradas, parece que o dos Peares non ten máis ideas que a austeridade, que aínda non quedou moi claro en que consiste máis alá de vender coches oficiais e en reducir os litros de gasolina dos operarios de Medio Rural que andan limpando os montes, ou en non facer análises de toxinas nos polígonos mexilloeiros ou en non pintar as estradas porque o DOG segue a facer nomeamentos de cargos de difícil encaixe...