ORZAMENTOS INSOLIDARIOS EN VIGO (II)

Os orzamentos de Vigo dan as costas á crise económica.

.

Non hai ningún indicio, máis aló da edición de suplementos na prensa local, de que se vaia a facer coa celebración do Bicentenario. O orzamento adianta meramente a vontade de gasto. Aínda que as contas "non son unha repartición de pastel", segundo Domínguez, sobre os 400.000 euros que el xestionará no evento, Caballero engade outros 200.000 para o mesmo. E non será o único acontecemento importante que depare 2009 á cidade.

Tamén partirá de Vigo a regata internacional Atlantic Challenge, antes coñecida como Cutty Sark. Caballero dedicará a iso 200.000 euros, e outros 90.000 á celebración da Feira Mundial de Pesca, á que á súa vez Domínguez destina outros 160.000 euros desde a parrilla de Turismo nunha partida específica desglosada dos gastos correntes deste departamento, que aumentan en 678.500 euros.

As tres celebracións citadas e a promoción da candidatura á Universiada consumirán polo menos 1,6 millóns. E aumentarán significativamente os gastos de publicidade e propaganda.

Os de persoal (capítulo 1) e os correntes (2) rexistran subidas do 5,19% e do 7,46% respectivamente. O de investimentos reais (6), con todo, só crece un 3,67%: por baixo da subida dos impostos (4,2%) e podería resultar equivalente ao índice de inflación. O Goberno prevé recadar, a pesar da crise, 6,8 millóns máis (5%).

A falta de crecemento nos investimentos reais máis o machazo ás citadas transferencias de capital (capítulo 7) reflicten tamén en si mesmas as opcións de gasto elixidas polo Goberno. Ambos capítulos sofren conxuntamente unha diminución do 30%: os 38 millóns do actual exercicio pasan a ser 23 millóns no próximo. A rebaixa drástica nas transferencias de capital fai que, por exemplo, desapareza a subvención á Federación de Asociacións de Vecinos (54.000 euros), xunto con outras moitas.

A diminución no gasto con incidencia social que se deriva do recorte nos capítulos 6 e 7 (investimentos reais e transferencias de capital) inclúe as obras de humanización ou embelecemento de rúas, que crece "sen precedentes", segundo Abel Caballero, ata os 9,3 millóns de euros, pero dentro dun departamento, o de Vías e Obras, que perde case un 4% do seu orzamento no actual exercicio. As transferencias ás empresas dentro das políticas de emprego mantén a mesma partida que o actual exercicio (257.000 euros) e as axudas ao emprego auméntanse un 5% (120.000 euros, dos que 25.000 destínanse á difusión de programas).

As partidas de Benestar Social crecen un 4% (278.000 euros), subida que queda practicamente absorbida polo aumento do IPC nos convenios xa existentes coas asociacións de axuda aos máis desfavorecidos. Ademais, redúcense nun 57% os investimentos do propio departamento, baixo competencia do BNG.

Tampouco sae ben parado o departamento de Educación, de competencia socialista, que perde o 1,9% da súa dotación no actual exercicio. Destínanse 400.000 euros ao programa de aulas internacionais, organizado para que os escolares vigueses vaian ao Reino Unido a aprender inglés. A cifra, como ben sinala Caballero, duplica a do actual exercicio no epígrafe común. Pero o alcalde evita informar de que do mesmo casilleiro desaparece outra partida de 300.000 euros que se destinou este ano a bolsas tamén para a aprendizaxe do inglés. En conxunto, xa que logo, as axudas para educación en linguas estranxeiras redúcense en 100.000 euros.