venres, 27 de xuño de 2014

A NOVA "ABANCA" DE ESCOTET

Máis castigo aos empregados e máis soldo aos conselleiros.

Cambio de marca, pero non de formas. Como Pego, Gorriarán e compañía, a primeira medida da nova cúpula foi duplicarse o soldo. Pola contra, o novo dono das antigas caixas galegas quere estender o horario de toda a súa rede de oficinas ata as 19:00 horas. Ademais, cambia o plan de incentivos comerciais e aparca a solución das preferentes aos familiares dos traballadores.

Cambiou a forma, neste caso a marca, pero non o fondo. Este xoves desapareceu NCG Banco, a antiga Novagalicia, reconvertida en Abanca, o novo logo imposto polo comprador, o venezolano Juan Carlos Escotet, para intentar separarse do seu pasado. Cambiou a imaxe, as cores, o tipo de letra pero os novos aires son antagónicos entre o que recibirá o seu recén nomeado consello e o que herdará o seu equipo. Fronte ao aumento de soldo aprobado para os conselleiros (de 300.000 a 500.000 euros, máis outros 100.000 euros en axudas) este mesmo mércores, no seu primeiro consello sen ter ao FROB como vixilante, Escotet pretende endurecer as condicións laborais dos seus empregados, segundo confirman fontes da entidade. O novo equipo directivo así transmitiuno xa internamente na convención de directivos que se celebrou o pasado sábado.
"Como pouco, non é moi afortunado que a primeira medida dos novos xestores fose duplicarse o soldo, cando esta entidade foi das primeiras en ser sinaladas polas millonarias indemnizacións (ascenderon a 18,9 millóns) de José Luis Pego, Gregorio Gorriarán e Óscar Rodríguez Estrada," denuncian dende o interior da entidade.
O novo equipo xestor pretende alongar o horario de apertura das 640 oficinas para que estas permanezan abertas ata as sete da tarde os cinco días da semana. Escotet e Javier Etcheverría, vicepresidente e presidente de Abanca, respectivamente, pretenden trasladar a toda a rede o horario singular que se implantou en 190 oficinas, como consecuencia da firma do último expediente de regulación de emprego (ERE). Nestes centros funciónase en quenda de mañá (9:00 a 14:00 horas) e de tarde (16:30 a 19:00 horas).
Para evitar o conflito cos sindicatos, posto que a dirección non pode tomar esta decisión de forma unipersoal (o horario está fixado no convenio en vigor), Escotet pretende xustificar esta decisión apelando aos clientes. Así, a entidade comezará unha enquisa entre os seus clientes para preguntalos polas súas necesidades de servizo e cales son os mellores momentos do día para acudir ás sucursais.
Por outra parte, a nova dirección procedeu a cambiar o plan de incentivos comerciais a falta de 24 días para a finalización do segundo trimestre. Este novo programa de retribución deixa fóra ao persoal dos servizos centrais, algo máis de 800 empregados, e propoñerá premios só por obxectivos de oficinas, facendo desaparecer o bonus polos obxectivos individuais.
Ademais, o novo equipo anunciou que os familiares e traballadores da entidade serán os últimos afectados polas preferentes e débeda subordinada aos que se lles ofrecerá unha posible solución. Neste sentido, a antiga Novagalicia confía en ter solucionado este conflito o próximo 30 de setembro. A partir de entón, comezaríase a estudar, caso a caso, as denuncias dos familiares e traballadores.
Pero no interior da entidade non só preocupan estes cambios nas condicións laborables senón que crece o temor pola capacidade de xestión do novo equipo, afeito a dirixir entidades moito máis pequenas que Abanca. Pénsanse que unicamente por incrementar o financiamento a pemes e familias está todo feito. Despois de todo o vivido nesta entidade dende a súa nacionalización, a fuga de clientes e de pasivo, hai moito traballo por facer. Necesítase moito coñecemento do mercado español, algo que gran parte do consello non ten," aseguran dende a entidade.
 Xunto a Escotet e Etcheverría, o novo consello está formado por Francisco Botas, conselleiro delegado de Abanca e ex director xeral de NCG Banco dende marzo. Así mesmo, foron nomeados Raúl Baltar Estévez (Vigo, 1963), xerente xeral do Headquarter Banesco Grupo Financiero Internacional, en Panamá, dende abril; Pedro Raúl López Jácome (Lalín, 1959), fundador e CEO do Grupo MWM Securities-Miura Financial Services; e Carina Szpilka Lázaro (Bos Aires, 1968), integrante dende 1998 do equipo que lanzou ING Direct en España e no que permaneceu ata 2013. Tamén forma parte do consello de administración Miguel Ángel Capriles López (Caracas, 1963), que foi durante 15 anos presidente do Consello e conselleiro delegado do principal grupo de medios imprimidos de Venezuela, Cadena Capriles.
Ademais, tamén preocupa a parte do equipo que o novo equipo se estea a rodear dunha segunda fila directiva integrada por "os delfíns de Pego (ex director xeral de Novacaixagalicia) ou Gayoso (ex presidente das fusionadas caixas) que levaron ás dúas caixas ao desastre".

luns, 23 de xuño de 2014

OIA ENCARGA O PROXECTO PARA DERRUBAR O TALASO

O xulgado advirte o Concello que se non pon en marcha a demolición ditada en sentenza firme será sancionado.

O Concello de Oia, na provincia de Pontevedra, encargou finalmente e de mala gana a redacción do proxecto de derrubamento do Hotel Talaso Atlántico, levantado sobre as rochas en Mougás con 4,5 millóns de axudas oficiais e con sentenza firme de derrubamento dende 2009 por ocupar o dominio público cunha licenza declarada ilegal. O alcalde, Alejandro Martínez (PP), asinou un decreto o 29 de maio polo que adxudica o traballo a O.P.V. Arquitectura e Urbanismo por un importe de 8.040, 66 euros.
O decreto rubrícao o rexedor tan só seis días despois de que o Xulgado do Contencioso-Administrativo número 3 de Pontevedra lle remitise unha providencia en que lle daba 10 días de prazo para "indicar en que estado se encontra a execución en canto á demolición refírese", ou expoñerse a unha multa de 1.500 euros " e se aínda así segue sen verificar o requirimento reiteraranse as devanditas multas ata a completa execución do fallo xudicial".
O enfado da maxistrada resulta da acumulación de avisos ao rexedor no mesmo sentido. Xa en abril do ano pasado avisou a Rodríguez de que lle impoñería sucesivas multas en tanto non puxese en marcha o derrubamento. O Concello recorreu a decisión sen éxito e finalmente decretou a demolición na última semana do ano pasado, a punto de que expirase prazo. En febreiro, e nos mesmos termos -ou resposta ou multa- volveu pedir información o xulgado. O ultimato máis recente é o de maio, ao que se responde con no encargo de redacción do proxecto de derrubamento.
A frouxidade municipal ten os seus defensores. O dono do hotel, especializado en terapias con auga mariña, Jesús Pérez Gil, solicitou o ano pasado o apoio do entón presidente dos empresarios pontevedreses e agora dos galegos en xeral, José Manuel Fernández Alvariño, e de alcaldes da bisbarra para reclamar laxitude no cumprimento da lei en nome dos 60 empregos directos do complexo. E ata o propio presidente da Xunta, Alberto Núñez Feijóo, se inclinou en xaneiro, unha vez aprobado a orde de derrubamento, por buscar unha solución legal polo suposto "enorme contido turístico, económico, social e laboral" do Talaso. O Concello de Oia sostén a controvertida tese de que a aprobación do Plan de Ordenación (pendente dende 2006) podería branquexar o expediente.
Pero o caso é que o edificio hoteleiro invade o dominio público de Demarcación de Costas -que tamén ameaza con quitarlle a concesión- porque a suposta norma municipal que o ampara non existía, segundo o Concello de Oia por un erro administrativo. As verteduras fecais do complexo tamén estiveron baixo sospeita xudicial. 

luns, 16 de xuño de 2014