RECICLAXE

Galicia, entre as comunidades que menos lixo separan e máis recorren ao transporte privado.

Galicia figura entre as comunidades nas que a poboación separa menos os seus residuos domésticos e entre as que máis se recorre ao transporte privado, dous factores que non contribúen á preservación do medio ambiente, segundo datos divulgados polo Instituto Nacional de Estatística. A poboación de Galicia, segundo a enquisa do citado organismo estatal, atópase amplamente por baixo da media dos fogares do conxunto de España, excepto na separación de medicamentos, en que está lixeiramente por encima. Os datos indican que dous terzos dos fogares galegos depositan as pilas e pequenas baterías en colectores especiais, fronte a case tres de cada catro no conxunto de España, e máis dunha décima parte tamén separan os fluorescentes, fronte a case unha quinta parte en todo o país. Con todo, pouco máis da metade dos fogares separan o papel e o cartón, os envases de plástico ou metálicos, os produtos químicos e pinturas, e os aceites de cociña usados, o que supón entre dez e quince puntos por baixo da media do conxunto de España.

Respecto da utilización de medios de transporte, o INE subliña que no conxunto de España o 45,3% dos cidadáns confesan utilizar o transporte privado, mentres que en Galicia fano un 60%, o que a sitúa como a segunda comunidade, por detrás de Baleares, co 62%.

En cambio, apunta que o 21,7% dos cidadáns españois utilizan o transporte público nos seus desprazamento cotiáns, mentres que en Galicia fano só un 18,8%. En canto aos que se despraza a pé, en España constitúen un 30,3%, unha media que só tres comunidades non alcanzan; en Galicia representan o 19,3%.