PREMIO Á INCOHERENCIA

O PSOE galego sitúa a dous altos cargos no consello de administración

Raro, raro. O desenlace da inevitable e imprescindible fusión das caixas de aforros galegas non puido resultar máis estraño. Como premio a meses de manobras dilatantes, de receos e agravios do Goberno, de incoherentes cambios de rumbo, o PSOE galego sitúa a dous dos seus máis representativos altos cargos no consello de administración que pilotará os tres anos do axuste da nova entidade financeira, os máis transcendentais para marcar o seu futuro.
A presenza de Mar Barcón, secretaria de Política Municipal dos socialistas galegos e de Salvador Fernández Moreda, secretario provincial do partido na Coruña garante sen dúbida un dos principios que a lei de Caixas aprobada polo parlamento galego pretendía supostamente evitar: a indeseada politización da nova caixa de aforros galega. Resulta sorprendente que o PSOE, que se significou poderosamente durante todo o proceso esixindo unha maior despolitización, sexa agora quen se asegure unha desproporcionada representación. A incoherencia socialista, marca da casa en todo o que se refire ao mapa financeiro galego, como demostrou cando apoiaba e rexeitaba fusións e lei de caixas con horas de intervalo nunha secuencia de actuacións obstaculizadoras e declaracións contraditorias que a punto estiveron de truncar o proceso, non podería recibir tan indebida recompensa se non fose pola indolencia demostrada polos responsables da Xunta no proceso e a cegueira da dirixencia do PP galego, que recibiu un gol por toda a escuadra no último minuto de partido.
Poderá alegar agora a organización que preside Alberto Núñez Feijóo que o penalti era ilegal ou que houbo falta previa ao seu porteiro, pero o feito certo é que o único partido que poderá contribuír a marcar a liña de acción da nova caixa de aforros galega desde o seu consello de administración será o PSOE que lidera, hai que recoñecer que con marrullera astucia, Manuel «Pachi» Vázquez. E non pode dicirse que a capacidade de influencia sexa menor: Salvador Fernández Moreda, será o único presidente de Deputación presente na caixa resultante, nada menos que como vicepresidente primeiro.
Para maior dislate, Barcón e Moreda intégranse no Consello como parte da cota de poder de Caixa Galicia, rompendo así os sectarios esquemas de quen pretendían sinalar a caixa coruñesa como proclive ao PP, á vez que atribuían a Caixanova, que elixiu unha representación estritamente profesional, unha posición supostamente tributaria do PSOE. Tan falsos entón como agora ambos os intentos de descualificación, si conviría aclarar a impertinencia da presenza da número tres do PSOE galego na dirección da nova caixa galega: Mar Barcón mantívose como integrante da asemblea como representante da Coral Polifónica de Betanzos, demostrando unhas ignotas afeccións musicais nun dos feudos municipais do seu partido. A súa presenza no novo Consello non é só discutible. É abertamente incongruente.