A MENTIRA VÍSTESE DE INTERÉS XERAL

NOTA DE PRENSA

.

En xullo de 2006, foi aprobada por unanimidade do Pleno da Corporación Municipal de Vigo unha moción consensuada cos veciños afectados pola depuradora.

O contido deste acordo presupuestaba obras para mellorar o funcionamento da depuradora sempre avaliado polos técnicos pertinentes.

Catro meses máis tarde, en plena pre-campaña das municipais co PXOM e os terreos da nova depuradora como cabalo de Troia para sacar tallada electoral, PP, PSOE e BNG ou mellor dito Corina, Caballero e Domínguez, invocando "interese xeral", agárranse como a un clavo ardendo á solución que coidan terá menor custo político e eletoral, pasándose pola entreperna o que fora xa votado e aprobado no pleno, por eles mesmos meses antes.

A solución para eles, é desfacer a actual depuradora "preto de 6.000 millóns de pesetas invertidos", diñeiro de tod@s, é construir no mesmo sitio unha gran macrodepuradora. Non sabemos en que espazo, se invaden e reducen aínda máis a Xunqueira do Lagares, se se expropian ás xentes que viven na zona, ou as duas cousas ó mesmo tempo. Tampouco sabemos que van facer cos verquidos que van á actual depuradora mentras duren as obras.

Para chegar a tomar esta decisión, fálannos de consenso. ¿Consenso entre quen? Mentira! O que sí houbo, foi reparto da tarta electoral entre tres: Domínguez, que estaba fora de xogo e quería protagonismo a calquera prezo. Corina, sacar da man unha pataca quente, e Caballero, non ter compromisos no caso de ser él o alcalde, para aprobar o PXOM, xa con ubicación da depuradora.

Por certo, señor Caballero, o PXOM non lle valía e era moi malo antes das eleccións. Agora, case que o mesmo, xa lle vale. ¿Onde queda a oposición e o traballo razoado de Mauricio Ruiz? Ou só era para usar os colectivos de afectados que lle votaran para deixalos despois tirados?

Véndennos a mentira da macrodepuradora en Coruxo decíndonos que non hai outro sitio, cando todo o mundo sabe que hai outras alternativas. Ben é certo tamén que onde viven os ricos non se quere vivenda social nin depuradoras. A súa merda que a cheiren outros.

Entre outras alternativas, existe a construción de minidepuradoras coa paulatina separación entre pluviales e fecais (sempre en espazos reservados co menor impacto ambiental) o longo da cunca do Lagares.

Vigo está en deuda coas xentes que viven arredor da depuradora. Levamos máis de 10 anos sufrindo. Chegou a hora de reparar esta inxustiza. Somos solidarios coa cidade e coa Ría. Falamos de compensar @s afectad@s, pero non con cartos, como algúns pensan. O que pedimos alto e claro é o dereito de vivir dignamente nas nosas casas, así como á recuperación integral dun espazo único como é a Xunqueira de Lagares.

José Antonio Fernández Pérez, portavoz da comisión veciñal de afectados pola depuradora