martes, 2 de xuño de 2009

EUROPA ACHÉGASE A KIOTO

As emisións da UE dos 15 baixan un 5%, fronte ao 8% prometido

O alto prezo dos combustibles fósiles, a caída do consumo de gas e petróleo, así como o clima máis tépedo rexistrado en Europa contiveron as emisións de gases de efecto invernadoiro no continente. Estas situáronse en 2007 (último ano de datos uniformes para todos os países) un 9,3% por baixo das de 1990, segundo informou a Axencia Europa de Medio Ambiente (EEA, nas súas siglas en inglés). 1990 é o ano base ao que se refiren os recortes estipulados no Protocolo de Kioto. En canto á evolución no ano, en 2007 as emisións europeas caeron un 1,2% respecto ao anterior, o que supón 59 millóns de toneladas de CO2
A redución fixada en Kioto para a UE é do 8% en 2008-2012 respecto de 1990, polo que puidese parecer que xa cumpriu, pero non é así, porque ese 8% refírese á Europa dos 15 e quedan excluídos os novos países incorporados ata alcanzar os 27. Se se consideran exclusivamente eses 15 países comprometidos, a redución das emisións en 2007 era do 5%, polo que aínda quedan tres puntos que gañar na contención dos gases de efecto invernadoiro. O obxectivo pódese cumprir, segundo os expertos, á vista da evolución dos últimos anos. A caída interanual para os 15 da UE é de 1,6% en 2007 respecto de 2006, lixeiramente superior á media dos 27.
"Todos os países da UE dos 15 reduciron as súas emisións en 2007, excepto España e Grecia", informa a EEA.
Con todo, a caída importante das emisións españolas rexistrouse en 2008, cun 8% menos que o ano anterior, polo que o aumento respecto de 1990 está agora entre o 40% e o 42%, informou a secretaría de estado de Medio Ambiente. A tendencia considérase positiva pola caída das emisións pese ao crecemento económico rexistrado no período.
O obxectivo de España para cumprir Kioto é conter as súas emisións nun 15% de aumento máximo (pola repartición interna da UE), e se non o logra, como é seguro, terá que compensar a diferenza adquirindo dereitos de emisión de carbono no mercado internacional.
Un dato negativo a escala europea, segundo a EEA, é o aumento das emisións do transporte internacional, aéreo e marítimo, nun 6% (para a UE-27) respecto de 1990, aínda que están excluídas da contabilidade de Kioto.
De cara ao futuro, a UE comprometeuse a reducir as súas emisións nun 20% en 2020 respecto ao nivel de 1990 co obxectivo de evitar que as temperaturas medias do planeta suban máis de dous graos.

Ningún comentario: