VERTEDOIRO ILEGAL NO PARQUE ALOIA

A Xunta tolera un vertedoiro ilegal xunto ao parque natural de Aloia.

.

As tres administracións coñecen a ilegalidade desde fai meses.

.

Ao parque natural do monte Aloia, en Tui, estalle saíndo un gran. É o primeiro parque de Galicia, agora cumpre 30 anos e a Consellería de Medio Ambiente comprometeu a súa próxima ampliación ata 2.000 hectáreas, que englobarían dous inmensos vertedoiros de lodos de granito, unhas 150.000 toneladas, que están crecendo contra toda norma, á brava en pleno monte, cerca do actual perímetro do parque.

As tres administracións coñecen a situación desde fai tempo. Os informes oficiais sobre o asunto comezaron a circular fai polo menos oito meses. Os dous puntos de vertedura, a uns 50 metros de distancia entre si, no lugar de Moutentán, parroquia de Ribadelouro, aproveitan os ocos dunha vella explotación mineira de granito, que desbordan con impresionantes noiros de 15 a 20 metros polos que afloran copas de árbores e troncos xa talados como evidencia de que o chan non recibiu o menor tratamento para o uso que se lle están dando.

O groso da vertedura compono lodos de granito procedentes de serrerías próximas de Porriño, pero tamén engorda con outros residuos metálicos e plásticos. Escavacións Tuy, SL figura como responsable da faena, aínda que tamén baleiran camións doutras empresas, probablemente subcontratadas en negocios entre particulares.

Escavacións Tuy tramitou os permisos entre 2002 e 2004 e a partir desta data comezou as verteduras nun punto autorizado pola Consellería de Medio Ambiente para o depósito de lodos prensados de acordo a un proxecto que incluía a regulamentaria construción de canles de garda e de drenaxe a pé do noiro e dunha balsa de decantación para minimizar o impacto na zona. Estas medidas veñen requiridas á súa vez para protexer a masa de verteduras do arrastre por escorrentía de augas de choiva, fenómeno frecuente se se ten en conta que os vertedoiros atópanse a media ladeira do monte. Agora o primeiro deles parece abandonado, semicuberto de terra na parte superior.

Ningún dos requisitos esixidos para a actividade desenvolvida e que figuraban no proxecto foi cumprido. O vertedoiro tampouco conta con licenza municipal de apertura. Nin dispón de licenza urbanística, como correspondería á importante transformación do chan que se está executando, nin de autorización específica da Consellería de Política Territorial polo uso que se dá a chan rústico. Todas estas esixencias de control son tamén incumpridas no segundo punto de vertedura, para o que non hai ningunha licenza e que, xa que logo, pode considerarse absolutamente clandestino, ademais de non dispor das medidas de prevención e protección que poderían autorizar os depósitos, que aumentan día a día.

A uns 20 0 30 metros do segundo vertedoiro existen varias captacións de auga, o que induce a considerar nas denuncias presentadas un "inminente risco de contaminación dos efluentes subterráneos por filtración de compoñentes dos residuos ao subsolo". O que non se filtre, as choivas acabarán arrastrándoo ata o río Louro. Tamén se temen posibles deslizamentos da vertedura por efecto das explosións nas canteiras de en fronte, en Porriño, ou das choivas.

Na Xunta hai denuncias presentadas ante as consellerías de Medio Ambiente e de Política Territorial pedindo a "inmediata suspensión da actividade" e a incoación de expedientes de restitución da legalidade urbanística e sancionadores. A Policía Autonómica elevou informes aos seus superiores fai polo menos dous meses. Antes coñeceu o asunto a Administración central. Tamén foi denunciado no concello de Tui, ao que pertence o parque natural do Aloia, que Medio Ambiente promete estender á Serra do Galiñeiro co grando dos vertedoiros dentro.