RECHEOS NO PORTO DE VIGO

"Están enganando á opinión pública con informes innecesarios", di a súa presidenta

A Autoridade Portuaria de Vigo non ve necesario iniciar un estudo de impacto ambiental na segunda fase do recheo que proxecta realizar no peirao do Areal, situado cerca do céntrico paseo de Montero Ríos. A primeira fase, que supón unha ampliación de 49.200 metros, está executándose sen eses informes porque así o autorizou o Ministerio de Medio Ambiente. A existencia dun plan anterior frustrado, que incluía recheos superiores en tamaño aos decididos finalmente, amparou a actuación, que mellorará o calado nesa zona entre catro e cinco metros.
En 24 meses comezará a segunda fase, que gañará ao mar outros 30.200 metros para conseguir máis espazo para a atracada dos buques e un calado de ata 16 metros. A suma das dúas obras, que conseguirán case 80.000 metros cadrados de superficie adicional, non se axusta, con todo, ao que di o Plan Especial de Ordenación do Porto, segundo un informe do concello de Vigo. O documento especifica que, ademais, "requiriría da previa aprobación do Plan de Usos", en opinión dos técnicos de Urbanismo. Por todo iso, o concello advertiu á Autoridade Portuaria, que preside Corina Porro, que debe de someter o plan a unha análise de impacto por "os efectos acumulativos e significativos para o medio ambiente que pode producir co proxecto anterior e outros previstos ou en execución que afectan á ría de Vigo".
Porro cre que facelo equivale a pór o carro diante dos bois: cando chegue o momento de licitar a operación suponse que estará aprobado o Plan de Usos, e quere someter a obra ao seu amparo. "Estase enganando á opinión pública con informes innecesarios", di Porro en referencia directa ao concello. A presidenta insiste en que lle preguntou ao ministerio que dirixe Elena Espinosa que informes deberá presentar para ese segundo recheo. O ministerio confirma que a consulta foi realizada e que o expediente está aberto.
Pero desde o concello que preside Abel Caballero, o seu rival nas pasadas eleccións municipais, recórdaselle que unha sentenza do Tribunal Supremo declarou ilegais as obras de recheo en Marín "realizadas ao amparo, unicamente, do Plan Especial, sen contar co Plan de Usos". A Autoridade Portuaria foi condenada xunto á Xunta e a Deputación de Pontevedra a repor a zona á súa anterior situación, algo que a estas alturas parece imposible de cumprir. O fallo tumbou a decisión inicial do Tribunal Superior de Xustiza de Galicia.
En Vigo énchese a primeira fase con cascallos procedentes do tunel do AVE e estúdase o xeito de continuar prolongando o peirao Transversal en 80 metros cara ao interior da ría. O Porto baralla tres posibilidades para realizar esa segunda ampliación. Na súa análise, o informe asinado polo director do Porto, Luís Lara, destaca que as tres alternativas terán un impacto sobre o medio "relativamente similar". As obras de atracada e chairas provocarán "ocupación de fondos, modificación hidrodinámica e ruídos".
A primeira das alternativas propón construír un peirao de caixóns de formigón cimentados nunha banqueta de dique (apoio que comunmente se usa en enxeñería marítima) con columnas de grava que afiancen a obra. É a opción menos agresiva atendendo ao volume de recheo que necesita (560.000 metros cúbicos), para conseguir unha chaira de 30.200 metros. Se se decanta por esta opción, o Porto estará obrigado a dragar 260.000 metros cúbicos de lodos.
A segunda alternativa partiría dun peirao de pilotes que conseguiría a mesma superficie pero cun recheo sensiblemente maior, de 600.000 metros cúbicos. Non farían falta dragados, pero si tería un importante volume de dique de 80.000 metros cúbicos.
A última opción, tamén sen dragado, baséase nun peirao de tablestacas (perfís, xeralmente metálicos, que se usan en obras definitivas). Necesitaría un recheo de 900.000 metros cúbicos.