martes, 17 de agosto de 2010

A SÚA FORTUNA A OBRAS DE CARIDADE

Sorprendente e gratificante resulta a iniciativa de Bill Gates e Warren Buffet pola que un bo puñado de multimillonarios norteamericanos doarán a metade da súa fortuna a obras de caridade. En palabras máis ou menos certeiras de Buffet, trátase de devolver así á sociedade gran parte do que a sociedade fixo por ese grupo de privilexiados, que non é outra cousa que facelos inmensamente ricos.
Con todo, non por iso hai que concluír que o capitalismo, na súa expresión actual, é esencialmente bo para a humanidade, pois ese altruísmo de gran altura é a excepción que confirma a regra da ambición e a desmesura.
Agora ben, quizais Gates e Buffet poderían crear un think tank -tan de moda en Estados Unidos- para convencer aos Gobernos dos países do G-20 da necesidade de implantar un imposto internacional, compatible cos tributos nacionais, que grave ás grandes fortunas, para destinalo ao que aquí chamamos obra social.
A caridade, non nos enganemos, é a outra cara da inxustiza, e a crise económica que vivimos puxo de manifesto os desaxustes dun sistema económico que, por si só, acabaría con todo no seu afán desmedido de obter o máximo beneficio co mínimo investimento. Ademais de donativos, fan falta regras.

Ningún comentario: